Chareldine van der Merwe (foto: Izak de Vries)
Chareldine van der Merwe van die VVA vertel vir Naomi Meyer van Koop-’n-Afrikaanse-boekdag, wat nou al jare lank suksesvol plaasvind.
Chareldine, waar kom die idee van Koop-'n-Afrikaanse-boekdag vandaan? Hoe lank is dit al aan die gang?
Die Koop-’n-Afrikaanse-boekdag het in 2004 ontstaan toe ’n destydse lid van ons (VVA) spitsraad, Nolte Smit die blink gedagte gehad het van ’n dag waarop mense gevra word om ’n Afrikaanse boek te koop. Hierdie jaar is dus ons vyftiende Koop-’n-Afrikaanse-boekdag, en ons is baie trots op hierdie projek.
Waarom so 'n dag aanbied?
Ons wil graag mense aanmoedig wat Afrikaanse praat en ’n liefde vir die taal het op dié vra om die boekbedryf te ondersteun. Deur die projek kan ons ook verseker dat skrywers en uitgewers nog Afrikaanse werke skep as ons hulle ondersteun.
Boeke is duur, veral in 'n land waar dit voel asof alles duurder word. Is daar enige winskopies ter sprake? En waar kan mense gaan inloer? Ook: wat van mense wat werklik nie kos of boeke kan bekostig nie, wat kan hierdie dag vir hulle beteken?
Die lys is aangeheg wat die promosies van deelnemende winkels aandui (rol ondertoe om deelnemende winkels te sien). Ons wil verder mense aanmoedig wat dit kan bekostig om boeke te koop, boeke aan mense of instansies skenk wat dit nie noodwendig kan bekostig nie. Verder hoop ons deur die verskillende promosies mense op 14 Augustus dalk die boek kan koop wat hulle al lank reeds ingedagte het, maar nie kon bekostig teen gewone pryse nie.
Deesdae is daar soveel ander vermaak wat aan kinders gebied word: Netflix, YouTube, noem maar op. Dink jy kinders lees nog genoeg? En maak dit saak?
Dit is baie belangrik dat kinders so vroeg as moontlik aan boeke blootgestel moet word om ’n leeskultuur te skep. Kinders moet in ’n woordryke omgewing grootword sodat hulle toekomsgereed kan wees. Ouers speel hier ’n baie belangrike rol, en moet self ’n voorbeeld stel deur self te lees. Lees is aangeleerde gedrag net soos enige sport waarin kinders wil presteer, moet oefen om die beste te word, so moet mens ook lees om ’n goeie leser te word. Hoe meer ’n mens lees hoe beter lees jy. Die belangrike ding is om die regte boek by die regte kind te kry, jy moet weet wat die kind se belangstelling is. Ons sien elke dag hoe opgewonde kinders word wanneer ons deur middel van boektrommelprojek boeke aan skole skenk. Ja, kinders lees en wil lees.
Behalwe vir inisiatiewe soos hierdie Koop-'n-Afrikaanse-boekdag, wat dink jy is volhoubare maniere om te help om kinders meer te laat lees?
Maak lees lekker en deel van jou daaglikse roetine. Kinders moet die belangrinkheid van lees verstaan en sien. Indien hulle sien dat jy (pappa, mamma, ouma, oupa, boetie of sussies) tyd maak vir lees sal hulle besef dat lees belangrik is. Dit is ook ’n feit dat kinders wat lees beter vaar op skool en die wêreld beter verstaan.
Verryk jou wêreld met Koop-’n-Afrikaanse-boekdag
Hoeveel keer het jy nie al in ’n boekwinkel gestaan met die nuutste Deon Meyer of Ingrid Winterbach boek en gewik en geweeg of jy hom moet koop nie? Wanneer jy die groot sprong maak en jou weg vind na die kassier, begin jou gewete aan jou knaag. Moet jy nie maar wag tot die boek op uitverkoping is nie? Betaaldag is nog vêr en jou finansies lyk maar beroerd.
Op 14 Augustus met Koop-’n-Afrikaanse-boekdag kan jy gerus daai lastige stemmetjie sus en daai speurverhaal of kinderboek vir die rakkers koop.
Dié dag is toegewy aan die Afrikaanse geskrewe woord. Die projek is deur Vriende van Afrikaans (VVA), ’n filiaal van die ATKV, van stapel gestuur.
“Ons wil op hierdie dag die publiek aanmoedig om ’n Afrikaanse boek te koop,” sê Chareldine van der Merwe, projekbestuurder van die VVA.
“Dit is ook die ideale tyd om ’n boek te koop, want baie boekwinkels gaan op die dag afslag op hulle boeke aanbied.
“Ons moedig almal wat Afrikaans praat en ’n liefde vir die taal het om op die dag vir hulself ’n boek te koop. En diegene wat dit enigsins kan bekostig, word ook gevra om ook ’n Afrikaanse boek te skenk aan iemand wat dit nie self kan bekostig nie.”
Volgens haar wil hulle ook op hierdie dag skrywers en die Afrikaanse boekbedryf ondersteun.
“Op hierdie dag moet ons, ons ondersteuning aan die boekbedryf wys. Skrywers en uitgewers kan slegs nog literêre werke skep as die publiek hulle ondersteun.”
Verder meen sy dit is ook belangrik dat die liefde vir lees van vroeg af by kinders gekweek word
“Vir dit om moontlik te wees, moet ouers self ook lees. Jy as ouer moet self ’n liefde vir boeke en lees hê om dit aan jou kind oor te dra.
“Deur kinders in ’n woordryke omgewing groot te maak, word hulle toekomsgereed gemaak.”
Die volgende boekwinkels bied op 14 Augustus afslag aan:
CUM BOEKE: 15%-afslag (Alle takke landwyd)
PNA: Strand Square, Somerset Mall, Somerset Square, Eikestad Mall, The Sanctuary, Whale Coast & Gordons Bay Mall: 25%-afslag
Protea Boekwinkels: 20%-afslag (Alle takke landwyd)
Exclusive Books: 20%-afslag (Alle takke landwyd)
Aneljo Boekwinkel: Mariental, Namibiё 20%
The post Koop-’n-Afrikaanse-boekdag 2019: ’n onderhoud appeared first on LitNet.